اتأكد بنسبة كبيره غياب الظهير الشاب أليخاندرو بالدي عن قمة نهائي كاس ملك إسبانيا اللي هتجمع برشلونه بريال مدريد يوم السبت الجاي على ملعب لاكارتوخا في إشبيلية، وده بعد إصابته في ماتش ليجاميس في الجولة ٣١ من الليجا.
الصحفي خوسيه ألفاريز في برنامج “الشرينجيتو” الإسباني، قال إن بالدي مش هيكون جاهز للمشاركة، وإصابته محتاجه وقت أطول عشان يتعافى بالكامل، ودي خساره فنيه كبيره للفريق الكتالوني اللي داخل اللقاء بثقة بعد ما فاز على ريال مدريد في آخر مواجهتين، واحدة في الدوري والتانيه في السوبر بشهر يناير.
غياب بالدي هيفتح الباب أمام مشاركة جيرارد مارتن، اللي متوقع يكون البديل في التشكيل الأساسي قدام الملكي في النهائي الكبير.
بالدي ممكن يرجع في مباراة الكلاسيكو الجايه في الدوري، بالجولة ٣٥، اللي هتكون يوم ١١ مايو، لكن ده لسه مرهون بسرعة تعافيه من الإصابة اللي وُصفت بإنها معقده شوية.
برشلونه بيحاول يدخل النهائي بأفضل تشكيل، لكن غياب عنصر شاب ومؤثر زي بالدي أكيد هيسبب صداع لأنش فليك قبل المواجهه المنتظرة.
